Rektori prof.asoc.dr.Samedin Krrabaj, ka nënshkruar marrëveshjen e anëtarësimit të Universitetit “Ukshin Hoti” në Prizren në Qendrën e Inovacionit Digjital me lokacion në ITP Prizren. Një gjë e tillë është bërë e ditur përmes një postimi në faqen zyrtare te Universitetit n֝ë Facebook .
Sipas njoftimit kjo qendër ndihmon bizneset lokale dhe institucionet arsimore të bashkohen duke kryer kërkime dhe hulumtime mbi ide të reja për digjitalizimin e proceseve të tyre.
“Universiteti është koordinator i modulit të testimit para investimit të ideve inovative e cila i mundëson stafit akademik dhe studentëve të kryejnë hulumtime të ndryshme gjatë testimeve të ideve të ndryshme për digjitalizimin e proceseve të bizneseve të vogla dhe ato të mesme në Kosovë dhe më gjerë”, thuhet në njoftim.
Në kuadër të kësaj qendre Universiteti ‘Ukshin Hoti’ do të ofrojë trajnime të ndryshme, konsulta profesionale për komunitetin e biznesit. Universiteti do të jetë pjesë e shumë projekteve përmes kësaj qendre e cila është një burim i shkëlqyer për gjenerimin e fondeve për hulumtime.
“Prorektorja prof.ass.dr.Zirije Hasani dhe ass.Endrit Fetahu, kanë qenë të përfshirë prej më shumë se një vit në këtë projekt i cili u jetësua me nënshkrimin zyrtar nga ana e rektorit të Universitetit tonë. Universiteti përfiton vlerë monetare mbi 100000 mijë euro për realizimin e aktiviteteve”, thuhet tutje në njoftim.