Universiteti i Prizrenit “Ukshin Hoti” për studentët e rinj do të organizojë javën e mirëseardhjes ku me këtë rast do të realizohen aktivitete të ndryshme, me qëllim që studentët të përgatiten për jetën studentore.
“Të gjithë në Universitet janë të entuziazmuar që të takohen me ju dhe së bashku, ne kemi bashkuar një program kualitativ dhe emocionues të ngjarjeve dhe aktiviteteve që do t’ju ofrojnë informacion thelbësor për të filluar, mundësi për tu socializuar, eksploruar dhe kontribuar dhe t’ju sigurojnë përshtypjen e parë pozitive dhe lidhjen e qëndrueshme me Universitetin”, thuhet tutje në njoftimin e universitetit.
Ngjarjet kryesore dhe orari janë:
E martë, ora 10:00, në Amfiteatrin e madh
1. Eventi qendror me të gjithë studentët e regjistruar nga ku studentëve do t’u drejtohet me fjalë përshëndetëse rektori i Universitetit, Prof.Asoc.Dr Mentor Alishani dhe njëkohësisht studentët do të njoftohen me aktivitetet që zhvillohen ne kuadër të Qendrës së Karrierës e poashtu do të marrin edhe njohuri rreth Kodit të Etikës së Universitetit. Studentët do të njoftohen edhe me strukturat e Parlamentit Studentor dhe aktiviteteve që zhvillojnë studentët.
E martë ora 11.00 në sallat e të gjitha Fakulteteve.
2. Pas eventit qendror, studentët do të shpërndahen tek fakultetet ku ata janë regjistruar. Aty do të mbahet një takim mirëseardhës nga Dekani i fakultetit përkatës dhe ku pjesëmarrës do të jenë të gjithë mësimdhënësit dhe shefat e programeve. Studentët do të njoftohen me programin studimor, mundësitë që ofron universiteti, do të njoftohen me strukturat e fakultetit dhe procesin mësimor dhe me këshilltarët akademik në njësitë akademike.
Pas këtyre ngjarjeve, do të organizohet një vizitë nëpër kampus ku studentët do të njihen me sallat mësimore, bibliotekën, laboratorët, bufenë, dhe hapësirat e tjera.
Ndërsa gjatë gjithë javës, shefat e programeve do të takojnë personalisht studentët e interesuar, në bazë të nevojave që kanë për sqarime tjera shtesë.