Ministrja e Drejtësisë, Albulena Haxhiu, ka reaguar pas lajmit se është paditur për shpifje nga deputetja e Kuvendit të Republikës së Kosovës nga radhët e Partisë Demokratike të Kosovës, Blerta Deliu Kodra, raporton Gazeta Sinjali.
Përmes një postimi në rrjetin social Facebook, Haxhiu ka thënë se do ta bëjnë publik raportin financiar që sipas saj, dëshmon që Deliu Kodra është paguar pa qenë pjesëmarrëse në shumicën e mbledhjeve te Komisionit për Kompensimin e Viktimave të Krimit.
“Për çfarë më paska paditur deputetja Blerta Deliu Kodra? Për të vërtetën? Shumë mirë. Ne do ta bëjmë publik raportin financiar i cili dëshmon që e njëjta ndonëse nuk kishte qenë pjesëmarrëse në shumicën e mbledhjeve te Komisionit për Kompensimin e Viktimave të Krimit, ishte paguar për këtë në mënyrë të paligjshme. Para disa javëve, për këtë e kam njoftuar me shkrim Kryetarin e Komisionit për Legjislacion dhe po ashtu kam folur publikisht”, shkroi ajo.
Tutje Haxhiu ka thënë se në vend të padisë, veprimi i duhur nga ana e deputetes së PDK-së do të ishte kthimi i mjeteve, për të cilat ministrja thotë se i ka përfituar në mënyrë të paligjshme.