Në kuadër të projektit VoC të mbështetur nga USAID-i, TV Prizreni organizoi një takim informues me gazetarë dhe përfaqësues të mediave lokale në Prizren, me qëllim prezantimin e aktiviteteve dhe arritjeve të deritanishme të projektit, si dhe forcimin e bashkëpunimit ndërmjet mediave.
Takimi u udhëhoq nga menaxheri i TV Prizrenit, Salih Bytyqi, i cili prezantoi objektivat, aktivitetet dhe rezultatet e arritura në kuadër të projektit VoC. Gjatë takimit u zhvillua një diskutim i hapur mbi gjendjen e mediave në komunën e Prizrenit, sfidat me të cilat ato përballen, mundësitë e bashkëpunimit në të ardhmen, si dhe rëndësinë e projekteve të tilla në krijimin e partneriteteve të reja dhe zhvillimin e sektorit mediatik.
Në takim morën pjesë përfaqësues të Radio Prizrenit, e cila funksionon si organizatë e veçantë që nga themelimi i saj, përfaqësues të Radios Romano Avazo – radios së vetme në Evropë që transmeton për komunitetin rom, koordinatori dhe gazetari i portalit “Gazeta e Re”, si dhe bashkëpunëtorë të tjerë së bashku me stafin e TV Prizrenit.
