Prokuroria Themelore në Prizren ka parashtruar kërkesë në Gjykatën kompetente për caktimin e masës së sigurisë ndaj katër të dyshuarve që u kapën mbrëmë me mbi 1 kilogram drogë, raporton Gazeta Sinjali.
Nga PTH në Prizren kanë bërë me dije se është parashtruar kërkesa për caktimin e masës së paraburgimit ndaj L.M, A.B dhe dy vëllezërve V.K e J.K.
“Referuar pyetjeve tuaja, ju njoftojmë se Prokuroria Themelore në Prizren, sot me datë 09.11.2022 pranë Gjykatës Themelore në Prizren ka parashtruar kërkesë për caktimin e masës së paraburgimit kundër katër të pandehurve, për shkak të dyshimit të bazuar se të njëjtit në bashkëkryerje kanë kryer veprën penale “Blerja posedimi, shpërndarja dhe shitja e paautorizuar e narkotikëve, substancave psikotrope apo analoge” nga neni 267, lidhur me nenin 31 të Kodit Penal të Republikës së Kosovës (KPRK)”, thuhet në përgjigjen e PTH-së për Sinjalin.
Katër të dyshuarit janë arrestuar dje në flagrancë në vendin e ngjarjes, teksa janë gjetur dhe sekuestruar mbi 1 kilogram drogë e llojit marihuanë e cila ishte ndarë në 32 qese dhe ishte e gatshme për shitje apo shpërndarje. Po ashtu janë sekuestruar edhe disa qese me kokainë dhe gjësende tjera në cilësinë e provave materiale, si telefona, një veturë dhe peshore elektrike që shërben për matjen e substancës narkotike.
Të njëjtit do të hetohen nën dyshimet për kryerjen e veprës penale ‘Blerja, posedimi, shpërndarja apo shitja e paautorizuar e narkotikëve, substancave psikotrope ose analoge’.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.