Turqia e Gjeorgjia kanë luajtur ndeshje të fortë dhe shumë interesante. Në fund në stadiumin në Dortmund kanë festuar turqit, që në tribuna ishin dominantë.
Turqia fitoi 3:1 ndaj debutueses në Evropian, Gjeorgjisë, të martën pasdite.
Ylli i ri i Real Madridit, Arda Guler shënoi supergol në minutën e 65-të për fitoren e madhe të Turqisë. Ndeshja i ka takuar Grupit F të Euro 2024.
Guler gjuajtu mjeshtërisht nga distanca për ta vendosur sfidën që e dominoi Turqia.
Mert Muldur po ashtu shënoi gol të bukur në minutën e 25-të për 1:0. Dy minuta më pas Turqisë iu anulua një gol për pozitë jashtë loje.
Ndërkohë Gjeorgjia barazoi në 1:1 në minutën e 32-të. Georges Mikautadze shënoi nga afërsia, duke shfrytëzuar reagimin e zbehtë të mbrojtjes dhe portierit turk.
Ritmi ishte shumë i lartë edhe në pjesën e dytë. Turqit kanë rreshtuar rastet, por edhe Gjeorgjia kishte momentet e saj. Ndër të tjera e goditi traversën. Në minutat shtesë Gjeorgjia iu afrua shumë golit të barazimit. Madje e goditi shtyllën, ndërsa disa goditje të gjeorgjianëve u bllokuan dhe të tjera përfunduan jashtë.
Kerem Akturkoglu shënoi për 3:1 në minutën e 97-të, duke shfrytëzuar daljen në sulm të portierit gjeorgjian.
Më 22 qershor, Gjeorgjia luan ndaj Çekisë, ndërsa Turqia takohet me Portugalinë.