Kryetari aktual i Prizrenit dhe kandidat për një mandate të radhës Shaqir Totaj, në debatin e sontëm në “Pressing”, foli për arritjet e tij gjatë katër viteve në krye të komunës, duke theksuar se performanca e qeverisjes së tij është e matshme dhe e vlerësuar nga organizata kredibile.
Totaj theksoi se sipas KDI, Prizreni është komuna më transparente në vend, ndërsa Instituti GAP e ka renditur me nivelin më të lartë të transparencës buxhetore. Ai përmendi disa nga projektet kryesore të mandatit, përfshirë çlirimin e tranzitit, transformimin e Shadërvanit, rrugën e re që e shkurton qasjen në autostradë nga 10 në 6 kilometra, si dhe shpalljën e Prizrenit si Qytet i Sportit për vitin 2026 dhe rregullimin e sheshit të Bazhdarhanes pas rrënimit të ndërtesës “Liria”.
Totaj tha se vlerat që kanë përcaktuar qeverisjen e tij janë bashkëpunimi, solidariteti dhe komunikimi me të gjitha palët, duke theksuar se përveç projekteve të premtuara, janë realizuar edhe mbi 150 projekte të tjera shtesë.
“Qeverisim me nder dhe do ta vazhdojmë gjithpërfshirjen në çdo vendim për Prizrenin,” përfundoi Totaj.