Kryetari i komunës së Prizrenit, Shaqir Totaj, gjatë kësaj jave vizitoi shtetin Virxhinia të ShBA-ve ku zhvilloi një sërë takime dhe marrëveshje të rëndësishme.

Gjatë vizitës së tij, Totaj nënshkroi marrëveshjen e binjakëzimit të Prizrenit me qytetin Harrisonburg të Virxhinias, që do të shërbejë si urë për marrëdhëniet tona në arsim, shkencë, biznes, kulturë, sport, etj. Ndërsa, zhvilloi takime me kryetaren e komunës së Harrisonburg, Deanna Reed, menaxherin e qytetit, Ande Banks dhe zyrtarët komunalë, ku u zotuan për zgjerimin e bashkëpunimit përmes projekteve në interes të qytetarëve të të dyja vendeve.

Gjithashtu, ai zhvilloi një takim edhe me presidenten e Eastern Mennonite University (EMU), Susan Schultz Huxman dhe pronarët e bizneseve të Harrisonburg, si dhe u prit nga profesoresha Dr. Jennifer A. Taylor në James Madyson University (JMU) në një bashkëbisedim me studentët e këtij universiteti për Prizrenin, Kosovën në përgjithësi dhe mundësitë e shkëmbimit të tyre në vendin tonë./TVPrizreni/