Kryeministri i Kosovës, Albin Kurti, ka njoftuar se sot Ministri i Financave është autorizuar për themelimin e Fondit të Sigurisë.
Ky vendim është marrë në përputhje me nevojat e Forcave të Sigurisë së Kosovës, situatës aktuale dhe pas konsultimeve me partnerët ndërkombëtarë.
“Mjetet e mbledhura financiare synohet të përdoren në përputhje me strategjinë e sigurisë shtetërore të Republikës së Kosovës që pritet të miratohet nga Qeveria e Republikës se Kosovës. Funksionimi i këtij fondi do të rregullohet me akte përkatëse procedurale dhe do të përdoret ekskluzivisht për qëllimin e përcaktuar nga qeveria”, ka njoftuar Kurti.
Sipas tij, në përputhje me legjislacionin në fuqi do të zbatohen procedurat për prejardhjen e mjeteve financiare me qëllim të ruajtjes së integritetit të fondit dhe qëllimit të tij.
Kurti më tej ka ftuar qytetarët e Kosovës, bashkatdhetarët në diasporë por edhe donatorë të tjerë të kontribuojnë për sigurinë shtetërore.
Në këtë vendim thuhet se mjetet e këtij fondi do të pëdoren për mbështetjen e prioriteteve të Qeverisë, duke përfshirë fushën e mbrojtjes dhe sigurisë shtetërore, infrastrukturën e sigurisë, menaxhimin e katastrofave natyrore apo ngjashëm, bazuar në vlerësimin e Qeverisë.
Tutje thuhet se mjetet e grumbulluara do të buxhetohen dhe alokohen te Ministria e Mbrojtjes, si buxhet shtesë dhe do të përdoren në përputhje me legjislacionin përkatës për financat publike.