Një tërmet me magnitudë prej 7.7 shkallë të Rihterit ka goditur Birmaninë qendrore të premten, kanë raportuar shërbimet monitoruese. Tërmeti ka shkaktuar dëme edhe në kryeqytetin e Tajlandës, Bangkok, me qindra qytetarë që kanë dalë jashtë ndërtesave nga frika, raporton Reuters.

Policia dhe shërbimet emergjente në Bangkok kanë raportuar se një person ka mbetur i vdekur, një person është shpallur i humbur kurse 50 persona të tjerë janë lënduar pas shembjes së një ndërtese.

Autoritetet tajlandeze kanë shpallur gjendje të jashtëzakonshme në kryeqytet, ka bërë të ditur kryeministri i vendit, Paetongtarn Shinawatra të premten.

Është raportuar për dëme në disa ndërtesa në mbarë Bangkokun, duke përfshirë një rrokaqiell 30-katësh në ndërtim e sipër, që u rrëzua në pjesën veriore të qytetit

Nuk ka pasur ende ndonjë deklaratë nga autoritetet e Birmanisë në lidhje me shkallën e dëmeve të shkaktuara, teksa sipas Shërbimit Gjeologjik të Shteteve të Bashkuara tërmeti ka qenë me magnitudë prej 7.7 shkallë të Rihterit dhe me thellësi 10 kilometra.

Epiqendra e tërmetit ishte 17 kilometra larg qytetit me popullatë 1.2 milionëshe të Mandalay.

Video të ndryshme tregojnë për shembjen e ndërtesave në Bangkok, si dhe rrëzimin e një ure në Birmani.