Tërheqja e kursimeve nga Fondi i Pensionit nuk do t’i shërbejë komunitetit rom, sepse pothuajse 90% e tyre nuk janë të përfaqësuar në institucione publike dhe nuk do të kenë mundësi të tërheqin para nga Trusti.
Kështu ka thënë deputeti i Kuvendit të Kosovës që përfaqëson komunitetin rom, Erxhan Galushi, duke shtuar se ende nuk kanë marrë një vendim për apo kundër tërheqjes së mjeteve të Trustit. Megjithatë, ai shpreson se kjo tërheqje do të jetë e mirë për të gjithë qytetarët e Kosovës.
“Lidhur me kërkesën e tërheqjes së 30% të Trustit nuk kam ende ndonjë mendim konkret dhe arsyeja e vetme lidhur me këtë është se, unë si përfaqësues i komunitetit rom jam i vetdijshëm se e përfaqësoj një komunitet që e ka gjendjen jashtëzakonisht të vështirë socio-ekonomike dhe pothuajse 90% të komunitetit nuk janë të përfshirë në institucione publik. Dhe nuk besoj se kjo votë e imja do t’i shërbejë komunitetit, sepse shumica prej tyre nuk do të kenë mundësi të tërheqin para nga Trusti. Në përgjithësi, lidhur me këtë nuk jam as PRO as KUNDëR, jam ende duke menduar por shpresoj se kjo tërheqje do të jetë e mirë për të gjithë qytetarët e Kosovës”, tha Galushi për GazetaBlic.
Në anën tjetër edhe, deputeti Fridon Lala nga Iniciativa e Re Demokratike e Kosovës tha se vendimin për tërheqjen e 30% nga Fondi i Pensionit nuk e kanë shqyrtuar ende, por sipas tij duhet të gjetur formën më të mirë të ndihmohen të gjithë qytetarët.
“Vendimin për Trustin nuk e kemi shqyrtuar ende, por në përgjithësi mendoj se duhet për të gjetur formën që të ndihmohen të gjithë qytetarët e Kosovës, duhet të mendohet sa më mirë dhe jo të merren vendime të shpejta”, tha Lala për GazetaBlic.
Kujtojmë se, Partia Demokratike e Kosovës (PDK) – si partia më e madhe opozitare ka propozuar tërheqjen deri në 30 për qind të kursimeve pensionale.
Deputeti i kësaj partie, Bekim Haxhiu, në emër të Grupit Parlamentar të PDK-së më 9 mars ka dorëzuar në Kuvend Projektligjin për plotësimin dhe ndryshimin e Ligjit për Fondin e Kursimeve Pensionale, i cili do të mundësonte tërheqjen e këtyre mjeteve.
Sipas propozimit të PDK-së, kontributpaguesit që kanë më pak se 10 mijë euro kursime pensionale kërkohet që të kenë të drejtën e tërheqjes së 30 për qind të mjeteve.