Agjencioni për Mbrojtjen e Mjedisit të Kosovës u ka bërë thirrje të gjithë qytetarëve të Republikës së Kosovës që të tregojnë kujdes maksimal dhe të ndalojnë çdo veprim që mund të shkaktojë zjarr të pakontrolluar, veçanërisht gjatë kësaj periudhe me temperatura të larta dhe rrezik të shtuar nga zjarret.
Gjatë muajve të verës, temperaturat e larta dhe tharja e vegjetacionit krijojnë kushte të favorshme për përhapjen e shpejtë të flakëve. Zjarret mund të shkaktojnë dëme të mëdha në pyje dhe sipërfaqe bujqësore, të rrezikojnë banesat dhe infrastrukturën, si dhe të dëmtojnë rëndë biodiversitetin dhe cilësinë e ajrit. Në raste të caktuara, përhapja e tyre mund të kërcënojë drejtpërdrejt edhe jetën dhe sigurinë e njerëzve.
