Qeveria e Kosovës ka thënë se synohet që deri në vitin 2030, 30 për qind e flotës së automjeteve në vend të jenë elektrike apo hibride, që nuk ndotin ambientin. Ministri i Mjedisit, Liburn Aliu, e ka lidhur këtë synim teksa ka prezantuar konceptdokumentin për Fushën e Automjeteve dhe Strategjinë e Transportit Multimodal për vitet 2023-2030.
Në konferencën për media pas mbledhjes së Qeverisë, Aliu ka thënë se Kosova synon të kyçet në rrjetin e transportit me vendet tjera.
“Nga kjo strategji do të dalin projekte të rëndësishme që kanë të bëjnë me fushën e hekurudhave në veçanti. Kjo strategji do të ndihmojë që Kosova të arrijë që të zbusë emisionet nga ana e transportit dhe të sigurojë sigurinë në trafik. Siguria në trafik, të qenit i kyçur si rrjet dhe ndërlidhja e qartë e transporteve brenda vendit”, ka thënë Aliu.
Ai ka thënë se “synohet që në importimin e veturave në të ardhmen, t’i kushtohet rëndësi e veçantë veturave elektrike dhe hibride.
“Sipas këtij koncepti, synohet që në importimin e veturave të ardhmen t’u kushtohet rëndësi transportit elektrik në mënyrë që deri në vitin 2030, 30 për qind e flotës së automjeteve në vendin tonë të jenë elektrike dhe hibride. Na afrojnë më afër BE-së dhe na ofrojnë ambient më të pastër e krijojnë përgjegjësi te qytetarët karshi mjedisit”, ka thënë ai duke sqaruar se për veturat që emetojnë gazra do të ketë taksë më të madhe se për ato që nuk emetojnë.