Ministri i Punëve të Brendshme, Xhelal Sveçla ka reagur pasi sulmit që ka ndodhur në pastiçerinë “Sharr” në veri të Mitrovicës.
Në reagimin e tij, ministri thotë se ” prej tri vitesh angazhohemi pa reshtur në shtrirjen e sundimit të rendit dhe ligjit në veriun e vendit tonë që më parë ka qenë zonë e kontrolluar nga bandat kriminale të Serbisë e njollë e zezë për vendin tonë”.
Më tej, ministri shton se lufta ndaj grupeve kriminale të Serbisë është e pandalshme, transmeton Telegrafi.
“Lufta jonë e pandalshme ndaj grupeve kriminale të Serbisë dhe neutralizimi i ndikimit të tyre në masë ka arritur të krijojë normalitet jetese me ç’rast shumë qytetarë tanë atje kanë filluar të krijojnë mundësitë për zhvillimin e tyre”, pohon ai.
Ministri ka dënuar ashpër sulmin në veri, derisa ka kërkuar nga organet përkatëse të identifikojnë personat që kanë kryer sulmin.
“Ky fakt duket se i pengon edhe disa mbetjeve kriminale të Serbisë në veri me ç’rast në mëngjesin e sotëm jam njoftuar se është sulmuar me koktej molotovi pastiçeria “Sharr” në Mitrovicën e Veriut. Dënoj ashpër këtë sulm dhe kërkoj nga organet përkatëse në identifikimin sa më të shpejtë të kryesve e këtij akti kriminal dhe sjelljen e tyre para drejtësisë”, ka shtuar ai.
Ministri mes tjerash ka deklaruar se “Sulmet e tilla nuk do të na zmbrapsin asesi dhe jam i bindur se nuk do ti frikësojnë e ndalin as qytetarët tanë”.
“Rendi e ligji do të triumfojnë me çdo kusht mbi terrorin”.
Ndryshe, pastiçeria “Sharr” në veri të Mitrovicës është sulmuar me koktej molotovi mbrëmë pas mesnate.
Persona të panjohur kanë thyer xhamin në derën e lokalit dhe kanë hedhur koktej molotovi.
Lajmin për Telegrafin e ka konfirmuar zëvendësdrejtori i Policisë së Kosovës për rajonin e veriut të Mitrovicës, Veton Elshani.
“Rreth orës 03:30 ka pasur tentim zjarrvënie në veri të Mitrovicës. Dëme të vogla materiale janë shkaktuar. Për momentin nuk kemi të dyshuar”, tha Elshani.
Ditë më parë në të njëjtin lokal kishte qëndruar për pak kohë ministri i Punëve të Brendshme, Xhelal Sveçla me bashkëpunëtorë, gjatë një vizite që kishte bërë në veri të Mitrovicës./Telegrafi/
