Dy kirurgë të Klinikës së Kirurgjisë së Fëmijëve në QKUK janë përplasur fizikisht sot, më 26.01.2026.
Nga Policia e Kosovës kanë deklaruar për KALLXO.com se rasti po trajtohet si sulm.
“Sot rreth orës 08:00, kemi pranuar informatën për një përleshje fizike, e cila ka ndodhë në QKUK në Prishtinë. Bazuar në të dhënat fillestare, në këtë rast janë përfshirë dy persona. Në koordinim me Prokurorin e Shtetit rasti është iniciuar Sulm. Sektori i Hetimeve të Kryeqytetit po merret për sqarimin e plotë të rrethanave të rastit” – ka konfirmuar Enis Pllana, zëdhënës i Policisë në rajonin e Prishtinës.
Në anën tjetër, drejtori i kësaj Klinike, Sejdi Statovci ka thënë për KALLXO.com se për të dy kirurgët e përfshirë në rast është iniciuar procedurë disiplinore.
“Ka ndodhur një incident në klinikë. Nuk kemi qenë dëshmitar aty askush. Kemi iniciuar procedurën disiplinore për të dy kirurgët. Është thënë që ka pas përplasje fizike dhe njëri prej tyre e ka lajmëruar dhe Policinë”- tha Statovci.
Nga Zyra për Media e QKUK kanë thënë se nuk kanë detaje lidhur me arsyen e përplasjes fizike në mes kirurgëve.
“Në Klinikën e Kirurgjisë së Fëmijëve ka ndodhur një incident mes dy punonjësve shëndetësorë. Sipas informatave fillestare, për rastin janë njoftuar organet e rendit, të cilat kanë dalë në vendin e ngjarjes. Për momentin nuk kemi detaje shtesë lidhur me shkaqet” – ka thënë Mirlinda Qyqalla, zëdhënëse e QKUK./Kallxo.com