Deputeti i Kuvendit të Kosovës nga radhët e LDK-së, Lutfi Haziri e ka quajtur situatë të neveritshme mos-konstituimin e Kuvendit.
Para mediave, Haziri tha se nuk po mund ta ushtrojnë mandatin e tyre.
“Situatë e neveritshme, nuk po mund ta ushtrojmë mandatin tonë. Problem serioz politik. Propozimi nuk është i mjaftueshëm, duhet me kanë i zgjedhur. Nuk kanë marrëveshje për qeveri, Kuvendi po mbahet peng”, theksoi ai.
Po ashtu, edhe deputeti tjetër i kësaj partie, Armend Zemaj, tha se presin nga LVV që të reflektojë.
“Presim që të reflektoi LVV, të sillet konform rezultatit zgjedhor. Nuk kanë marrëveshje me ndonjë subjekt politik që siguron mandatimin e qeverisë. Nuk mund të ndryshojmë qëndrim sepse është e paarsyeshme, sepse ne nuk e kemi mandatin për krijimin e institucioneve deri në një fazë tjetër. Ne kemi një heshtje të kryeministrit, duket se i konvenon kjo situatë. Ka ditë që nuk ka deklarim nga ana e tij e që po shihet se është lojë politike e paaftësisë së tij për të krijuar një shumicë parlamentare”, tha ai para mediave.