Policia e Kosovës në Malishevë, në bashkëpunim me Drejtorinë e Arsimit dhe Edukimit, organizuan një takim me disa prej drejtorëve të shkollave për të diskutuar sigurinë në shkollë dhe për të planifikuar hapa konkretë në parandalimin e dukurive negative.
Komandanti i Stacionit Policor, Nazmi Zogaj, shprehu gatishmërinë për të bashkëpunuar me të gjitha palët për të siguruar një mjedis të qetë dhe të sigurt për nxënësit dhe stafin.
Drejtoresha për Arsim dhe Edukim, Arbresha Krasniqi, theksoi përkushtimin e saj për të forcuar prioritetin e sigurisë në shkolla, duke ofruar kushte më të mira për nxënësit dhe stafin arsimor.
Ndërkohë, drejtorët e shkollave ngritën kërkesat e tyre për të përmirësuar sigurinë dhe për të krijuar një ambient të motivuar për nxënësit në mësimnxënie dhe për mësimdhënësit në mësimdhënie. Gjithashtu, u përmend nevoja për avancimin e bashkëpunimit me prindërit dhe strukturat e tjera të shkollës.
