Banorë të rrugës së Nashecit në Prizren kanë shprehur shqetësimin për gjendjen e disa shtyllave elektrike, të cilat, sipas tyre, janë dëmtuar nga erërat e forta disa javë më parë.
Sipas njoftimit të qytetarëve, një shtyllë elektrike është rrëzuar, ndërsa edhe dy të tjera rrezikojnë të rrëzohen. Ata thonë se rasti është raportuar në KEDS, por deri më tani, sipas tyre, nuk është ndërmarrë asnjë veprim për sanimin e problemit.
Banorët theksojnë se telat elektrikë ndodhen në tokë dhe janë të ekspozuar, duke paraqitur rrezik serioz për kalimtarët, veçanërisht për fëmijët që frekuentojnë këtë zonë.
Ata u bëjnë thirrje institucioneve dhe kompanive përgjegjëse që të ndërhyjnë sa më parë për eliminimin e rrezikut dhe sigurimin e zonës, me qëllim parandalimin e ndonjë incidenti të mundshëm.
Klikoni KËTU për tu bërë pjesë e kanalit të TV Prizreni në Youtube.
