Përderisa “Zgjoi” është në pritje të lajmit të madh nëse do të nominohet për “Oscar”, gati 100 mijë euro është buxheti që ka vendosur të japë shteti për fushatë e lobim drejt çmimit të madh. KOHA ka marrë vesh se sot në mbledhjen e cila ende po vazhdon, Qeveria ka miratuar kërkesën e Ministrisë së Kulturës që 95 mijë e 725 euro të përdoren për “mbështetje të pjesës së dytë të kampanjës së filmit ‘Zgjoi’”. Vendimi vjen 17 ditë para se të publikohet lista me 5 të nominuarit për çmimin e “Academy Awards” për filmin ndërkombëtar.
Filmi nën regji të Blerta Bashollit është në listë të ngushtë. “Zgjoi” konsiderohet si një rrëfim që shpalos plagët e thella që lufta e fundit vragoi mbi fate njerëzish, duke shërbyer njëkohësisht si frymëzim për mbijetesë. Filmi për të cilin Basholli ka shkruar edhe skenarin është i bazuar në rrëfimin e Fahrie Hotit dhe shpërfaq sfidat e grave në mungesë të burrave si pasojë e luftës së fundit në Kosovë. Më 21 dhjetor u dha lajmi se “Zgjoi” është në listën e 15 filmave që presin nominimin. Më 27 mars pritet të mbahet ceremonia kryesore e çmimeve të mëdha.
