Presidentja e Kosovës Vjosa Osmani-Sadriu ka reaguar në Twitter pas tragjedisë që ka goditur sot Turqinë ku pas një shpërthimi në një minierë thëngjilli kanë mbetur të vdekur 41 persona dhe 11 të tjerë janë plagosur.
Osmani ka shprehur ngushëllimet për familjet e viktimave dhe thotë se populli i Kosovës qëndron pranë popullit turk në këtë kohë të vështirë.
“Ngushëllimet tona më të thella shkojnë për familjet e viktimave të shpërthimit tragjik të minës në Bartin. Mendimet tona janë me më të dashurit e tyre, të lënduarit dhe popullin e Turqisë në këtë kohë të vështirë”, shkruan Osmani.
Katërdhjetë e një persona kanë humbur jetën dhe 11 të tjerë janë plagosur në një shpërthim që ka ndodhur në një minierë thëngjilli në Turqinë veriore, njoftuan autoritetet vendore.
Të dhënat e reja vijnë pas përfundimit të operacionit të kërkim-shpëtimit, për më shumë se 20 orë pas shpërthimit vdekjeprurës që ndodhi të premten.
Më herët ministri i Brendshëm tha se 58 persona ishin duke punuar në minierë në momentin kur ndodhi shpërthimi në një thellësi prej më shumë se 300 metrash.
Suleyman Soylu tha se 10 persona mbeten në spital, ndërsa ekipet e emergjencës kanë punuar gjatë gjithë natës, duke gërmuar gurët për të arritur deri te personat e mbijetuar.
