Pos formës jo të mirë te Lyoni, ylli shqiptar i futbollit, Xherdan Shaqiri, po përballet edhe me probleme shëndetësore kohëve të fundit. Lojtari ditë më parë ka kaluar për herën e dytë përballjen me koronavirusin, ka shkruar gazeta franceze e sportit “L’Equipe”.
30-vjeçari ishte infektuar fillimisht në tetor të vitit 2020. Më pas ishte vaksinuar dy herë, por për shkak të riinfektimit mungoi në ndeshjet e fundit. Siç edhe është raportuar, Shaqiri tani është kthyer në ushtrime dhe është i gatshëm për përballjen me Paris Saint-Germainin në fundjavë.
Ditë më parë u raportua se Lyoni po synon largimin e reprezentuesit të Zvicrës për shkak se lojtari s’i ka përmbushur pritshmëritë e klubit. As Shaqiri s’është i kënaqur me minutazhën që ka pasur tek ekipi francez.
Në fillim të këtij edicioni, Shaqiri u transferua me bujë te madhe te Lyoni nga Liverpooli, por ai ka luajtur në vetëm 13 prej 22 ndeshjeve që i ka zhvilluar ekipi, duke shënuar një gol dhe asistuar dy herë.
Te Lyoni tashmë po presin ofertat për Shaqirin, i cili ka kontratë deri në vitin 2024 dhe pagë vjetore prej 4.5 milionë eurosh.
Lyoni është në kërkim të zëvendësuesit për Shaqirin dhe tashmë ia ka vënë syrin Serdar Azmounit të Zenitit.
Për Shaqirin, interesim tashmë kanë treguar ekipet nga Turqia dhe SHBA-ja.
