Dy të dyshuarit për spiunazh në ndihmë ndaj BIA-s serbe, Bedri Shabani e Muharrem Qerimi nuk e kanë pranuar fajësinë në seancën e sotme në Gjykatën Themelore në Prishtinë.
“Plotësisht jam i pafajshëm”, ka thënë Shabani.
Ndërkaq fajësinë e mohoi edhe Qerimi.
“Nuk e pranoj për veprën penale të spiunazhit, e për armëmbajtje pa leje e pranoj fajësinë”, tha ai.
Shabani sipas aktakuzës ka spiunuar te BIA në formën e mbledhjes dhe dërgimit të informacioneve, dokumenteve dhe materialeve që ndërlidhen me UÇK-në përfshirë eprorët e saj si dhe me ngjarjet dhe objektet si spitali ushtarak i UÇK-së në fshatin Molopollc të Shtimës dhe masakrën e Reçakut në atë mënyrë që i pandehuri të dhënat dhe informacionet në fjalë ia kishte transmetuar zyrtarit të lartë të BIA-së Sergjan Rosiq, përgjegjës për regjionin e Pançevës si dhe kolonel Bogolup Janiveviq ish-komandant i policisë së Serbisë në regjionin e Ferizajt, gjatë kohës së luftës në Kosovë dhe udhëheqës i operacionit ushtarak në masakrën e Reçakut.
Bedri Shabani akuzohet se e ka ndihmuar BIA-n në krijimin e një narrative të pavërtetë me qëllim që të ndërlidhë spitalin ushtarak të UÇK-së të Molopollcit të Shtimes me të ashtuquajturën ‘Shtëpia e verdhë’ në Burrel të Shqipërisë, kinse janë bërë trafikim organesh, si dhe ka vënë në dyshim të vërtetën e Masakrës së Reçakut.
Edhe Muharrem Qerimi akuzohet se e ka kryer veprën penale “Spiunazh”, sipas kodit penal të Republikës së Kosovës.
Muharrem Qerimi nga viti 2012 e në vazhdimësi nga arrestimi i tij e deri më datë 5.06.2024 e ka ndihmuar BIA-n në formën e mbledhjes dhe dërgimit të informacioneve dokumenteve dhe materialeve të ndryshme që kanë të bëjnë me luftën dhe pjesëtarët e UÇK-së, emrat e eprorëve të Policisë së Kosovës, IKP-së, AKI-së, pastaj emrat e dëshmitarëve tashmë të njohur të Dhomave të Specializuara të Kosovës në Hagë, pastaj në lidhje me veprat penale të krimit të organizuar, korrupsionin e të cilat informacione ia ka transmetuar zyrtarit të lartë të BIA-s, Sërgjan Rosiq.