Mbi 170 persona janë shpallur në kërkim nga Policia e Kosovës. Lidhur me rastet e fundit të vrasjeve si në Gjilan e Hajvali është përfolur mundësia e ikjes së të dyshuarve në Serbi. Shteti që i strehon kryerësit e sulmit terrorist në Banjskë, sipas një ish-koloneli policor, u jep mbrojtje kriminelëve dhe të dyshuarve për vepra penale në Kosovë. Koloneli i pensionuar Refki Morina thotë se ekziston edhe rreziku që Serbia t’i përdorë ata që i strehon për qëllimet e veta kundër Kosovës
Janë bërë tri javë që kur Policia e Kosovës është duke i kërkuar Mefail, Edonis dhe Engjull Shkodrën, nën dyshimet për vrasjen e trefishtë në Gjilan, por edhe Xhemail Nuhiun për vrasjen e ndodhur në Hajvali.
E vendndodhja e këtyre të dyshuarve besohet të jetë Serbia.
Nga të dhënat e Policisë del se ata janë ndër 15 personat që janë publikisht në kërkim për vrasje, nëse llogariten edhe tentim-vrasjet dhe shtytjet në vrasje.
Derisa shumica e personave në kërkim, në bazë të faqes zyrtare të Policisë, janë për vjedhje – për veprat më të rënda, si vrasjet, veprat terroriste e krimet e luftës – disa nga të dyshuarit e të dënuarit besohet se kanë gjetur strehim në Serbi.
Ish-koloneli, Refki Morina, thotë se për ikje të tilla shfrytëzohen rrugë apo shtigje për kalim ilegal të kufirit me Serbinë dhe kontrabandistët.
Ai thekson se gjatësia e kufirit është e madhe.
“Në një mënyrë është edhe gjerësia apo gjatësia e kufirit mes Kosovës dhe Serbisë që është gjatësi bukur e madhe dhe është e vështirë që brenda pikave kufitare të kontrollohet në tërësi terreni dhe e shfrytëzojnë këtë mundësi… Vendet të cilat përkufizohen me Serbinë shpeshherë, për shembull si Gjilani me Dheun e Bardhë dhe këndej kah Podujeva, shpeshherë ata e dinë territorin më mirë se si të kalojnë në pikat kufitare, e edhe jashtë pikave kufitare në mënyrë ilegale. Domethënë, e njohin terrenin më mirë dhe ata e shfrytëzojnë këtë mundësi edhe shfrytëzojnë edhe njerëz të cilët trafikojnë njerëz që i qesin në Serbi me para”, ka thënë Morina.
Koloneli policor në pension, i cili ka punuar në herët edhe në Drejtorinë për Migrim dhe të Huaj në Policinë e Kosovës, thotë se Serbia nuk i kthen shtetasit e Kosovës që hyjnë ilegalisht në territorin e saj.
Morina thekson edhe se ekziston rreziku që të arratisurit të përdoren nga strukturat e sigurisë së Serbisë.
“Duke e ditur pushtetin serb çfarë është, personat e ndryshëm të cilët kalojnë në Serbi për shkak të veprave të rënda penale që kryejnë në Kosovë, ata mundohen t’i shfrytëzojnë këta persona atje, me qëllime të caktuara ose nga BIA ose institucione të tjera të sigurisë me qëllime të caktuara, për të marrë informata për institucionet tona, për sigurinë, për gjyqësinë, për zhvillimet e tërësishme në Kosovë e kështu me radhë”, ka thënë Morina.
Krahas disa të dyshuarve e të dënuarve për vrasje, në Serbi besohet se strehohen edhe të dyshuar për sulmet terroriste në Banjskë e në Varagë të Zubin Potokut, e edhe të dyshuar për krime lufte.
Në bazë të regjistrit online që Policia e Kosovës e konsideron si listë aktive, del që 174 persona janë në kërkim. Një pjesë e madhe, apo mbi 60, janë për lloje të ndryshme të vjedhjeve e deri te grabitja e armatosur.
Në kërkim ka edhe persona për krime që lidhen me shitblerjen e narkotikëve, kontrabandë, zjarrvënie, lëndim trupor, dhunim, ngacmim seksual, vjedhje identiteti e keqpërdorim i kartelave bankare, si dhe mashtrim./koha.net/