Kandidati për deputet nga LDK-ja, Driton Selmanaj, ka folur për këngën që këngëtarja Edona Llalloshi i ka kushtuar kryeministrit në detyrë, Albin Kurti, gjatë një tubimi në Zvicër.
Selmanaj ka shprehur pakënaqësinë e tij për përmbajtjen dhe nivelin e këngës, duke e konsideruar atë të papranueshme.
“Tragjikomedi. Më vjen keq edhe për atë këngëtare që e kam vlerësuar më përpara, madje e kam dëgjuar dhe më vjen keq ku deri ku bjen niveli, edhe i artit, edhe artistave. Për mua janë këto gjëra kalamash, jo që i takojnë njerëzve serioz, shteteve serioze, ose së paku atyre që pretendojnë për seriozitet. Unë gjithmonë nuk i kam pasur për qejf kur edhe figurave historike, edhe të vdekurve ju kanë dedikuar këngë, e lere më për të gjallët”, ka thënë Selmanaj në emisionin “Info Nata” në Tëvë 1.
Ai ka shtuar se kënga nuk reflekton respekt ndaj figurës së dedikuar dhe ka paralajmëruar një reagim të mundshëm nga këngëtarja.
“Mendoj që Edona Llalloshi nesër ose më vonë do të jetë e turpëruar me këngën që e ka bërë edhe e ka kënduar. Dikur do të provojë të fshijë këtë këngë ose këtë pamje nga YouTube dhe çdo platformë tjetër, por do të jetë vonë. Njerëzit e tillë duhet të jenë të kujdesshëm sepse jeta publike ka peshë”, ka theksuar Selmanaj./teve1/