Presidentja e Kosovës, Vjosa Osmani pritet që sot gjatë ditës të publikojë dekretin për seancën konstituive të Kuvendit. Këtë e ka konfirmuar për RTKlive, Bekim Kupina, këshilltar i presidentes.
“Dekreti i seancës konstituive pritet të publikohet sot gjatë ditës “, thuhet në përgjigjen e shkurtër nga Kupina.
Pasditen e 27 marsit, KQZ-ja certifikoi rezultatin zgjedhor të zgjedhjeve të 9 shkurtit, nga i cili moment nisi edhe rrjedhja e afatit ligjor e kushtetues prej 30 ditësh që është për caktimin e datës së mbajtjes së seancës konstituive, aty ku deputetët e rinj pritet të betohen si ligjvënës së legjislaturës së nëntë të Kuvendit të Kosovës.
Lëvizja Vetëvendosje do t’i ketë 48 mandate në legjislaturën e re, 24 do t’i ketë PDK-ja, 20 LDK-ja, 10 vende janë për partitë jo serbe, 9 vende i ka Lista Serbe, 8 mandate do t’i kenë AAK-Nisma, ndërsa 1 ulëse e ka, Nenad Rashiq.