Në kryeqytetin e Maqedonisë së Veriut, komisionerja për Zgjerim e Bashkimit Evropian, Marta Kos, do të vazhdojë zhvillimin e bisedimeve me udhëheqësit e gjashtë vendeve të Ballkanit Perëndimor për përshpejtimin e zbatimit të Planit evropian të Rritjes për këtë rajon.

Në mesin e folësve kryesorë të samitit që po mbahet në Shkup janë kryeministri në detyrë i Kosovës, Albin Kurti, dhe presidenti i Serbisë, Aleksandar Vuçiq.

Komisioni Evropian njofton se plani i Rritjes i BE-së për Ballkanin Perëndimor synon të nxisë ekonominë e rajonit dhe të ndihmojë vendet e tij të bashkohen me BE-në.

Ai siguron 6 miliardë euro fonde për reforma dhe investime në fusha si energjia, transporti dhe transformimi digjital, me qëllim rritjen e prosperitetit dhe stabilitetit në rajon.

Një konferencë për shtyp me komisioneren Kos dhe kryeministrin e Maqedonisë së Veriut Hristijan Mickoski do të mbahet gjatë ditës.