Salih Mustafa nuk do të njihet më vetëm si i arrestuari i parë i Speciales.
Ish-eprori i Ushtrisë Çlirimtare të Kosovës do të jetë edhe i pari ndaj së cilit në Dhomat e Specializuara në Hagë do të nisë gjykimi i njëmendtë.
Procesi gjyqësor nis më 15 shtator 2021, 356 ditë pasi ish-komandant Cali u transferua në Holandë më 24 shtator të 2020.
E në vendimin e publikuar, të premten në darkë, nga kryetarja e trupit gjykues, holandezja Mappie Veldt Foglia, janë dhënë edhe disa urdhra dhe vendime për mbrojtjen dhe Zyrën e Prokurorit të Specializuar.
Është bërë e ditur edhe kërkesa e kësaj të fundit për kohën që i duhet ta japë fjalën hyrëse.
Për të ardhur deri te ky vendim ndaj Mustafës më 9 dhe 10 qershor u mbajtën tri seanca përgatitore radhazi, ku u bë e ditur se mbrojtja ende nuk ka përfunduar hetimet e saj dhe se nuk i ka takuar të gjithë dëshmitarët që i ka në listë.
Derisa para qershorit, ndaj ish-komandantit të Zonës Operative të Llapit ishin zhvilluar edhe gjashtë seanca të tjera të quajtura konferenca statusore.
Në to ishte bërë e ditur se ndaj Mustafës do të dëshmojnë më tepër se 16 dëshmitarë dhe se janë mbledhur mijëra dokumente nga prokurorët e specializuar.
Mustafa akuzohet se gjatë prillit të vitit 1999 kreu krime lufte në një qendër ndalimi në Zllash, në afërsi të Prishtinës, dhe përveç Jakup Krasniqit është i akuzuari i vetëm që e cilësoi procesin si padrejtësi në krahasim me mosgjykimin e serbëve që me urdhra shtetërorë kryen krime në Kosovë.
Kështu kishte mohuar gjithçka që gjendet në aktakuzë duke u deklaruar i pafajshëm./Rtklive
