Zëvendëskryeministri i parë dhe ministri i Jashtëm i Serbisë, Ivica Daçiq, ka thënë se vendin e tij po e pret një “udhëtim i vështirë diplomatik”.
Daçiq ka thënë se Serbia ka ndryshuar “ekuilibrin e pushtetit” në Kombet e Bashkuara (OKB) sa i përket numrit të vendeve që e njohin pavarësinë e Kosovës.
“Në Asamblenë e Përgjithshme të OKB-së, nga 193 anëtarë, Kosova nuk mund të marrë më shumë se 83 vota”, ka thënë Daçiq, duke shtuar se katër shtete e kanë njohur Kosovën, por nuk e votojnë atë, po ashtu theksoi se “ka vende që ndryshojnë qëndrim çdo gjashtë muaj”.
“Por ata (Prishtina) nuk kanë më një shumicë të qetë në OKB dhe në të njëjtën kohë një vendim i tillë për anëtarësimin në OKB duhet të kalojë në Këshillin e Sigurimit dhe kjo është arsyeja pse pozicioni i Rusisë dhe Kinës është shumë i rëndësishëm për ne, në mënyrë që ata të mund të vënë veton”, tha ai, raporton Danas.
Ai ka theksuar se për këtë arsye po thotë se “çështja e Rusisë, Ukrainës, Kosovës, Këshillit të Evropës dhe Kombeve të Bashkuara nuk mund të shikohet veçmas”.
“Dhe prandaj them se duhet të ketë një “paketë për Serbinë”, e cila para së gjithash do të fillonte nga Kosova dhe mendoj se një paketë e tillë për momentin nuk ekziston. Nuk kemi marrë asnjë propozim që do të ishte bazë për bisedë”, ka shtuar ai.
