Ministrja e Ekonomisë, Artane Rizvanolli përmes një konference për media ka folur në lidhje me marrëveshjen që është nënshkruar me MCC-në.
Ajo tha se me këtë marrëveshje të dyja vendet partnere janë zotuar të përmirësojnë të tashmen dhe të ardhmen energjetike të Kosovës.
“Sektori i energjisë në Kosovë ka qenë në nevojë urgjente për investime për vite me radhë, Qeveria e Kosovës dhe MCC kanë identifikuar mungesën e furnizimit të besueshëm me energji elektrike si pengesë kryesore për zhvillim ekonomik të Kosovës. Me nënshkrimin e kësaj marrëveshje të dyja vendet partnere janë zotuar të përmirësojnë të tashmen dhe të ardhmen energjetike të Kosovës, duke stabilizuar furnizimin me energji elektrike dhe përshpejtuar tranzicionin e saj drejt karbonizimit të energjisë”.
“Diversifikimi i burimeve të energjisë dhe decentralizimi i rrjetit me prodhues kërkon që të kemi kapacitete për të menaxhuar me përfshirjen e burimeve të ripërtëritshme në rrjet, duke maksimizuar shfrytëzimin e secilit kapacitet që ndërtohet, ndërsa pavarësia energjetike nuk përfshin vetëm kapacitetet e reja të gjenerimit, por edhe stabilitet të rrjetit energjetik të pavarur”, u shpreh ajo.
Tutje, ajo u shpreh se projekti i parë në këtë program është blerja dhe instalimi i baterive me kapacitet të lartë, përcjell Klankosova.tv.
“Projekti i parë në këtë program konsiston në blerjen dhe instalimin e baterive me kapacitet të lartë, këto bateri shërbejnë si rezerva të energjisë, të cilat do të përdoren për stabilizimin e frekuencës së luhatshme të rrymës, si pasojë e disbalancit të furnizimit dhe të konsumit”, u shpreh ajo.
Ajo u shpreh se rezervat e energjisë do t’i kursejnë Kosovës minimum 15 milionë euro në vit.
“Përdorimi i baterisë do të ndikojë në një masë në uljen e importit të shtrenjtë. Një kalkulim preliminar i MCC-së është që rezervat e energjisë do t’i kursejnë sistemit elektroenergjetik të Kosovës minimum 15 milionë euro në vit, kjo vlerë parashihet të jetë edhe më e madhe kur rriten çmimet e energjisë, siç po ndodhë këto ditë”, ka thënë ajo.
Rizvanolli tha se do të japin edhe subvencione për disa kategori, përcjell Klankosova.tv.
“Do të marrim masa të shpejta të rritjes së efiçencës së energjisë, përfshirë këtu edhe subvencione që shfrytëzojnë burime të tjera për ngrohje, jo energji elektrike, mirëpo edhe shtresat më të varfëra për t’u siguruar që ato kanë mundësi që ta mbajnë shtëpinë ngrohtë gjatë dimrit”, u shpreh tutje Rizvanolli. /klankosova.tv/
