Doza e tretë dhe ajo përforcuese, është mënyra e vetme për ta luftuar variantin e ri të COVID-19, të quajtur Omicron, ka thënë infektologu kosovar, Hamdi Ramadani.
Në një lidhje direkte në “60 Minuta” të KTV-së, Ramadani ka thënë se vetëm dy doza të vaksinës nuk ofrojnë mbrojtje të mjaftueshme ndaj variantit të ri, derisa ka kritikuar qytetarët dhe bizneset për mosrespektim të masave anti-COVID që janë në fuqi.
“E keqja e madhe është se e sulmon edhe personin me dy doza të vaksinës COVID-19, dhe edhe masat nuk janë duke u përfillur në masën që ato duhet të respektohen me përpikëri, që të mbrohemi nga pandemia, veçanërisht në hapësira të mbyllura. Nuk po respektohet as distanca. Vetëm doza e tretë ose doza përforcuese, mendoj se është mjeti dhe rruga e arma e vetme për ta luftuar ose mundur edhe variantin më të ri të COVID-19, Omicron”, ka thënë Ramadani.
Sipas tij, rritja e rasteve pozitive me koronavirus ditëve të fundit në Kosovë, ishte e pritshme, marrë parasysh ardhjen e mërgimtarëve për festat e fundvitit.
“Kjo rritje e rasteve me COVID-19 mendoj që po vazhdon dhe kjo ishte situatë që pothuajse e pritëm duke e marrë parasysh një ardhje masive të mërgimtarëve nga vendet ku është një situatë alarmante me COVID019 dhe bazuar në këto të dhëna, e ditëm se do të ndodhë kjo”, ka thënë Ramadani.
Ai ka thënë se është fat i mirë që Omicroni është shumë pak simptomatik, duke shtuar se preferohet që njerëzit e prekur nga ky variant të qëndrojnë të izoluar 5-6 ditë.