Prokuroria Speciale e Kosovës ka njoftuar se ambasadori i Kosovës në Kroaci, Martin Berishaj, është intervistuar nën dyshimin për tri vepra penale.
Siç ka bërë të ditur në një komunikatë për media kjo prokurori, Berishaj ishte ftuar edhe më herët për intervistim, por vetë ambasadori kishte kërkuar shtyrjen për shkak të angazhimit.
“Pas interesimit të mediave, Prokuroria Speciale njofton opinionin publik se ambasadori, i Kosovës në Kroaci, Martin Berishaj, është intervistuar sot me ftesë të Prokurorisë Speciale, me dyshimet për veprat penale ‘Shpëlarja e parave’, ‘Shmangia nga tatimi’ dhe ‘Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’. Po ashtu, ju njoftojmë se ambasadori Martin Berishaj, edhe më herët është ftuar për intervistim, por vet Berisha kishte kërkuar nga Prokuroria Speciale që të shtyhet intervistimi, për shkak të angazhimit të tij si ambasador”, thuhet në njoftimin e Prokurorisë Speciale.
Më herët gjatë ditës, Tomë Gashi, përfaqësues ligjor i ambasadorit Berishaj, ka thënë se Berishaj ka dhënë deklaratë sqaruese të premten në Prokurorinë Speciale të Republikës së Kosovës.
Sipas Gashit, intervistimi in tij është bërë lidhur me pretendimet që kanë dalë në media.
“Martin Berishaj qysh më 27.01.2023 ka paraqitur kërkesë për të dhënë deklaratë sqaruese në Prokurorinë Speciale të Republikës së Kosovës lidhur me pretendimet që kanë dalë në media. Martini tashmë ka dhënë deklaratë në PSRK”, ka shkruar Gashi në Facebook.
Ai më tej ka thënë se nuk mund të flasë asgjë lidhur me intervistimin e tij, pasi deklarata e Berishajt është konfidenciale.
