Kryeministri i vendit, Avdullah Hoti, në një konferencë për media ka thënë se situata epidemiologjike në vend është rënduar shumë dhe se Kosova ndanë të njëjtin fat me rajonin dhe Evropën.
Ai ka njoftuar se në mbledhjen e Qeverisë së Kosovës do të miratohen masat e reja për luftimin e koronavirusit.
Në këto masa të reja qytetet janë klasifikuar për nga numri i infektimeve me COVID-19.
E sipas klasifikimit qyteti i Prizrenit aktualisht ndodhet në zonën portokalli, e që i bie të futet në zonën me rrezikshmëri të mesme, nga 76 deri në 149 të infektuar në javë për 100 mijë banorë, shkruan TV Prizreni.
Masat që priten të merren nga Qeveria për zonën e portokalltë janë:
– operatorët ekonomik lejohen të punojnë nga ora 5:00 deri në ora 18:00, duke respektuar manualin për mbrojtje nga përhapja e Covid-19;
– shërbimet e hotelerisë dhe gastronomisë lejohen të punojnë nga ora 6:00 deri në ora 18:00, pas orës 18:00 punojnë me shërbim “merr me vete” dhe “porosi-dërgesë”;
– të reduktohet stafi punonjës në institucione publike dhe private;
– transporti publik lejohet të punojë me 50% të kapaciteteve duke respektuar manualin për mbrojtjen nga përhapja e virusit Covid-19;
– taksitë lejohen të punojnë me 1 pasagjer prapa (tre nëse janë anëtarë të familjes), duke respektuar manualin për mbrojtjen nga përhapja e virusit Covid-19/tvprizreni.net/
