Ardita Aliu-Sallauka që thotë se ka kandiduar për mësimdhënëse të Edukatës Muzikore në shkollën “ Ibrahim Fehmiu” në Prizren, ka ushtruar kallëzim penal ndaj drejtoreshës së Arsimit në këtë komunë.
Aliu-Sallauka thotë se e kaloi me sukses testin me shkrim, por intervistat nuk u mbajtën. Edhe pse nuk përfundoi procesi, në shkollë u punësua një mësues për këtë lëndë.
“Kandidatët që kemi qenë për 4 shkolla e kemi kalu testin me shkrim, në 3 shkollat tjera janë mbajtë intervistat, ndërkaq në ‘Ibrahim Fehmiu’ nuk kemi marrë ndonjë informacion. Ne kemi pritur deri tash, kur e kemi kuptu që në atë shkollë e kanë punësu dikëqë nuk ka qenë në test as në intervistë, d.m.th në mënyrë joligjore”, deklaroi ajo.
Në shkollë thonë se kanë marrë pjesë në testin me shkrim, por nuk janë ftuar për intervista e as nuk e dijnë se çfarë ka ndodhur me konkursin.
Drejtori i shkollës, Haki Gërguri, tha se tash e disa vite ka kërkuar që të bëhet një zgjidhje.
Nga 2018-ta mësimdhënësi që nisi punën me orar të plotë nga shtatori, kishte mbajtur orët plotësuese në këtë shkollë.
Ndërkaq në DKA-në e Prizrenit deklarojnë se mësimdhënësi që ka marrë pozitën është punëtor i vjetër aty, dhe është në vendin e njejtë të punës në bazë të ligjit.
