Presidentja e Maqedonisë së Veriut, Gordana Siljanovska-Davkova ka reaguar ndaj thirrjeve antishqiptare në ndeshjen basketbollistike mes Maqedonisë së Veriut dhe Rumanisë në Kumanovë më 02.08.2025.
Ngjarja prej saj është cilësuar si e turpshme, teksa ka shtuar se urrejtja dhe racizmi nuk kanë vend në fusha sportive.
“Nuk është sportive të keqpërdoret fusha e lojës për të ‘ushtruar’ gjuhën e urrejtjes, për të ofenduar dhe demonizuar me fjalë të helmuara e vrasëse. Me këtë akt nuk u goditën vetëm shqiptarët, por të gjithë ne, përfshirë edhe vetë ata që i shqiptonin ato fjalë,” shkroi Siljanovska-Davkova, përcjell Alsat Maqedonia.
Presidentja maqedonase ka propozuar që para çdo ndeshjeje të lexohet një porosi drejtuar tifozëve, në të cilën theksohet se sporti është farë fisnike dhe jo betejë me armë verbale, teksa ka shtuar se publiku nuk duhet të jetë mjet përçmimi e përçarjeje por burim mbështetjeje dhe motivimi.