Policia e Kosovës ka dhënë detaje për vdekjen e këngëtarit të njohur Shemsi Krasniqi, i njohur gjerësisht si Shemi, vokalisti i grupit të famshëm “Ilirët”.
Sipas raportit 24-orësh të Policisë së Kosovës, Shemi është gjetur pa shenja jete në banesën e tij, pasi gjendja shëndetësore i ishte përkeqësuar. Ekipet përkatëse kanë dalë në vendin e ngjarjes, ndërsa mjekët kanë konstatuar vdekjen. Me vendim të prokurorit, trupi i pajetë është dërguar për obduksion në Institutin e Mjekësisë Ligjore.
Shemsi Krasniqi, i njohur për publikun si Shemi, vokalisti legjendar i grupit “Ilirët”, është ndarë nga jeta në Prishtinë.
Largimi i tij ka tronditur jo vetëm botën e artit, por edhe publikun e gjerë, për të cilin zëri i Shemit ishte më shumë se muzikë – ishte kujtesë, identitet dhe ndjenjë kolektive.
Shemsi Krasniqi mbetet i paharruar si interpretuesi i këngës ikonike “Xhamadani vija vija”, e cila ndër vite u shndërrua në një simbol kombëtar, të kënduar brez pas brezi në ngjarje kulturore, festa dhe momente historike për shqiptarët.
Si vokalist i grupit “Ilirët”, një nga formacionet më të rëndësishme të viteve ’80, Shemi la gjurmë të thella në historinë e rock-ut shqiptar. Këngë si “Fjalët e qiririt”, “Kënga e Naimit” dhe “Larg vendlindjes” u bënë zë i mallit, atdhedashurisë dhe shpresës, në një kohë kur muzika ishte edhe formë rezistence.
Aktiv si në Kosovë ashtu edhe në diasporë, Shemi arriti të bashkojë shqiptarët përmes këngës, duke ruajtur gjallë lidhjen me gjuhën dhe kulturën kombëtare.
Me ndarjen e tij nga jeta, skena muzikore shqiptare humb një zë të fuqishëm, por trashëgimia artistike e Shemsi Krasniqit do të vazhdojë të jetojë përmes këngëve që u bënë pjesë e historisë sonë kolektive.