Policia e Kosovës, në bashkëpunim me Zyrën Ndërlidhëse të Turqisë në Prishtinë, kanë realizuar një trajnim të specializuar me temën: “Luftimi i Basteve dhe Lojërave të pa Ligjshme të Fatit Online”,
Ky trajnim i përbashkët është mbajtur në Akademinë e Kosovës për Siguri Publike në Vushtrri, nga data 26 deri më 30.06.2025.
Pjesë e këtij trajnimi ishin 18 hetues për hetimin e krimeve kibernetike nga të gjitha rajonet policore të Kosovës, si dhe nga Drejtoria për Hetimin e Krimeve Kibernetike, të cilët u angazhuan në një program intensiv të ndërtuar mbi përvojat më të mira ndërkombëtare në këtë fushë.
“Ligjërues në trajnim ishin dy ekspertë të lartë nga Policia e Turqisë, të cilët ndanë njohuritë e tyre të avancuara për metodat bashkëkohore të hetimit dhe parandalimit të veprimtarive të jashtëligjshme online, me fokus të veçantë në përdorimin e kriptovalutave, të cilat po përdoren gjithnjë e më shumë në veprimtari kriminale në nivel global”- thuhet në njoftimin e Policisë së Kosovës.
Në këtë trajnim thuhet se pjesëmarrësit u aftësuan në identifikimin dhe ndalimin e faqeve të internetit që ofrojnë lojëra të paligjshme të fatit, hetimin e rrjeteve kriminale që operojnë në mënyrë anonime në internet, gjurmimin e transaksioneve përmes kriptovalutave dhe analizën e rrjeteve financiare ilegale.
Ndërkaq në ceremoninë përmbyllëse morën pjesë Atasheu i Policisë dhe i Xhandarmerisë Turke, përfaqësues të Ambasadës së Turqisë në Prishtinë, si dhe eprorë të lartë të Policisë së Kosovës.
Policia e Kosovës vlerëson se ky trajnim paraqet një kontribut të drejtpërdrejtë në rritjen e kapaciteteve profesionale dhe e konsideron një hap të rëndësishëm drejt modernizimit të qasjes institucionale ndaj krimit të organizuar online.
Veprimtaria e lojërave të fatit në Kosovë është e ndaluar me ligj që nga viti 2019.