Policia e Kosovës ka apeluar që të përdoret me kujdes rrjeti social TikTok dhe ka kërkuar që të raportohen sfidat, në mënyrë që të parandalohen pasojat për shëndetin dhe jetën.
Në një reagim në Facebook, Policia tha të martën se “bota virtuale është po aq e rëndësishme sa jeta reale”. Ajo iu bëri thirrje qytetarëve të mos mashtrohen nga përmbajtjet në rrjetet sociale dhe të mos bëhen pjesë e lojërave që rrezikojnë jetën.
“Policia e Kosovës, Drejtoria e Policimit në Bashkësi dhe Parandalim apelon për kujdes të shtuar në përdorimin e rrjeteve sociale, në veçanti ndaj platformës TikTok, në të cilën kohe pas kohe publikohen sfida të ndryshme për të rinjtë/fëmijë, e të cilat nëse provohen mund të shkaktojnë pasoja në shëndetin dhe jetën e tyre. Policia e Kosovës po ashtu u bënë thirrje të gjithë qytetarëve pa dallim që të raportojnë në Policinë e Kosovës në rast se hasin në sfida të tilla, në mënyrë që të parandalohen pasojat të cilat mund të shkaktohen nga realizimi i tyre”, thuhet në njoftimin policor.
Autoritetet iu bënë thirrje fëmijëve që të bisedojnë me prindërit ose mësuesit për sfidat e tilla në internet.
“Të dashur fëmijë dhe prindër, kujdesi në botën virtuale është po aq i rëndësishëm sa ai në jetën reale. Mos u mashtroni nga ajo që shihni në rrjetet sociale dhe mos bëni pjesë në lojëra që rrezikojnë jetën. Bisedoni hapur me prindërit dhe mësuesit tuaj – vetëm së bashku mund të mbrojmë veten dhe të tjerët”, thuhet tutje në njoftim.
Deputetët diskutojnë mundësinë e ndalimit të TikTokut në Kosovë
Ndalimi i përdorimit të platformës TikTok në Kosovë është diskutuar të mërkurën nga ligjvënësit në mbledhjen e Komisionit për Çështje të Sigurisë. Në këtë mbled
koha.net
Sociologët kosovarë kanë bërë thirrje që Tiktoku të hiqet nga përdorimi për shkak të rreziqeve që bart.
Ai është ndaluar me vendim qeveritar që të ndalohet përdorimi i tij në institucione publike.
Sfida “Superman” është ndër më të përhapurat në këtë rrjet kinez. Në këtë sfidë, dy deri në tre persona tentojnë ta mbajnë personin tjetër që “fluturon” në krahët e tyre, por në disa raste ata më pas e rihedhin ose nuk e presin fare dhe personi bie në tokë.