Këshilli organizativ i festivalit tradicional “ Zambaku i Prizrenit,, njofton se festivali i këngëve qytetare Zambaku i Prizrenit i cili kohë më parë shpalli konkursin e vet të rregullt për kompozimet e edicionit të sivjetmë, ka pranuar një mori këngësh konkurruese nga të gjitha trevat shqiptare. Madje më shumë se herëve të tjera u ndie një interesim nga autorët shqiptarë për tu paraqitur me këngë të kësaj gjinie muzikore.
“Meqë Festivali po i ofrohet data e mbajtjes që është fundi i këtij muaji, organizatori ka caktuar komisionin përzgjedhës të këngëve të cilët pas një pune arritën të bëjnë listën e këngëve të cilat do të interpretohen Live në Kino “Lumbardhi” në Prizren me datën 28 qershor 2024. Komisioni në përbërje: Kreshnik Aliçkaj, kompozitor dhe profesor i Fakultetit të Arteve në Prishtinë, Kushtrim Jakupi, kompozitor, etnomuzikolog dhe profesor në Fakultetin AAB si dhe Profesoresha e Solo këndimit Elife Podvorica padi shqyrtuan tërë materialin e arritur në konkurs u përcaktuan për këto këngë:
- Dëgjimi i zemrës – Afrim Hajdari
- Zëri që i këndon dashurisë – Artan Bakija
- Qyteti i dashurisë – Edon Ramadani
- Himni i Bohemit – Shefqet Hoxha
- Aroma Jote – Endrit Rexhepi
- Era e dashnisë – Endrit Mullai
- E kuqe – Eriona Rushiti
- Bozhuri i Kosovës – Gazmend Kraja
- Perëndeshë e Prizrenit – Arsim Kryeziu
- Presin t’i zgjosh ti – Roland Guli
- Gabimin ta fala – Sami Pirraj
- Malli – Shkëlqim Dule
- Jetoj për ty – Sokol Marsi
- Kangë rruge – Tonin Tarnaku
- Lulet e Kosovës – Vullnet Ibrahimi
- Je si ëndërr që më zgjon – Zef Çoba
Organizatori do të përcaktojë profesionistë eminentë për të bëtë orkestracionin si dhe do të përzgjedhë solistë nga më të mirët me qëllim që Festivali të përmbushë kriteret profesionale në të gjitha aspektet që e bëjnë një ngjarje të veçantë kulturore e muzikore çfarë mëton të jetë Zambaku i Prizrenit. Sivjet do të ketë edhe shumë risi të tjera që Festivalin do ta ndjejnë spektatori si një vlerë që i përket traditës dhe veçanërisht frymës së këngës qytetare. Me respekt: Këshilli Organizativ i Festivalit ” Zambaku i Prizrenit 2024″.”, thuhet në njoftimin e KO të festivalit “ Zambaku i Prizrenit”.
