Policia dhe Prokuroria kanë njoftuar se D.H. është ndaluar për 48 orë pasi dyshohet se përvetësoi mbi 200 artefakte arkeologjike, prej tyre 80 monedha antike nga gërmime arkeologjike të paautorizuara në një zonën të mbrojtur arkeologjike.
Sipas njoftimit, Prokuroria e Gjilanit në bashkëpunim me Institutin Arkeologjik të Kosovës kanë identifikuar aktivitete të paautorizuara në vende arkeologjike dhe më 10.02.2025 është autorizuar Drejtoria e Krimit të Organizuar dhe Krimeve të Rënda në Prishtinë që të nisë hetime në çështjen penale ndaj të pandehurit D.H. për shkak të dyshimit për kryerjen e veprës penale – punimet e paautorizuara dhe përvetësimet e monumenteve kulturore.
“Ndërsa, sot më datën 13 shkurt 2025, me kërkesë të Prokurorisë Themelore në Gjilan, nga policia është realizuar urdhër kontroll në lokalin e tij në Gjilan, ku janë gjetur dhe sekuestruar mbi 200 artefakte arkeologjike, prej të cilave 80 monedha janë prej periudhës së sundimit romak, bizantin dhe mesjetar”- thuhet në njoftimin e Prokurorisë.
Sipas Prokurorisë, i pandehuri D.H. është ndaluar në kohëzgjatje prej 48 orëve pasi dyshohet se ka kryer aktivitete hulumtuese të paautorizuara në vende arkeologjike me pajisje detektuese./Kallxo.com/