Përleshjet mes të rinjve tashmë janë bërë të zakonshme në vendin tonë. Pothuajse çdo ditë raportohet për sherre të ndryshme, motivet e të cilave shpesh dalin të jenë banale. Për një rast të tillë që ka ndodhur dje në shkollën teknike ’11 Marsi’ në Prizren, Prokuroria ka nisur hetimet, raporton Sinjali.
Burimet e Gazetës Sinjali kanë bërë me dije se në përleshje janë përfshirë tre të mitur, me ç’rast dy prej tyre dyshohen se kanë sulmuar fizikisht një tjetër.
Si pasojë e lëndimeve të marra gjatë rrahjes, i mituri ka kërkuar ndihmë mjekësore në Emergjencën e Spitalit Rajonal në Prizren, teksa lidhur me rastin është njoftuar edhe Policia e Kosovës.
Njësitë policore kanë dalë në vendin e ngjarjes ku kanë intervistuar viktimën dhe të dyshuarit janë arrestuar.
Bazuar në dëshminë e 17-vjeçarit, e gjithë ngjarja ka ndodhur në oborrin e shkollës, ku për shkak të një konflikti të mëhershëm, dy të dyshuarit e kanë rrahur duke e goditur me grushte.
Të dyshuarit janë intervistuar në stacion policor në praninë e avokatëve të tyre dhe zyrtarit të Qendrës për Punë Sociale.
Me urdhër të prokurorit, ndaj tyre është iniciuar rasti ‘Lëndim i lehtë trupor’.