Përditësim 9:30 – Kryetar i Komisionit Qendror të Zgjedhjeve, Kreshnik Radoniqi, ka thënë se KQZ-ja ka marrë të gjithë hapat për përgatitjen e zgjedhjeve dhe se është e përkushtuar që t’i kryejë detyrat e veta.
“Prej ditës së shpalljes së zgjedhjeve, KQZ-ja ka marr të gjithë hapat për përgatitjen e këtyre dy proceseve zgjedhore. Pavarësisht sfidave që paraqiten në këtë kohë, KQZ-ja mbetet e përkushtuar që të kryejë detyrat e veta dhe në këtë drejtim është kjo ngjarje sot”, ka thënë ai gjatë tërheqjes së shortit të numrave për partitë garuese.
Përkundër incidenteve që kanë ndodhur në veri të Kosovës të martën, Komisioni Qendror i Zgjedhjeve (KQZ) po vazhdon përgatitjet për organizmin e zgjedhjet në veri të Kosovës.
Të mërkurën, KQZ-ja do të tërheqë shortin për renditjen e subjekteve politike në fletëvotimin e zgjedhjeve të jashtëzakonshme për kryetarë të Mitrovicës së Veriut, Zveçanit, Zubin-Potokut dhe Leposaviqit, si dhe për zgjedhjet e parakohshme të 25 dhjetorit për Kuvendin Komunal të Zveçanit dhe atë të Leposaviqit.
Zgjedhjet për kryetarë të katër komunave në veri janë caktuar të mbahen më 18 dhjetor, ndërsa zgjedhjet për kuvendet komunale do të mbahen më 25 dhjetor.
Të martën në Zubin-Potok dhe në Mitrovicë të Veriut, zyrtarët komunalë të zgjedhjeve dhe zyrtarët policorë, derisa kanë tentuar t’i hapin zyrat e Komisioneve Komunale Zgjedhore, janë sulmuar me shok-bomba dhe të shtëna në ajër. Është raportuar për disa shpërthime.
Si pasojë e kësaj atyre u është pamundësuar vazhdimi i procesit përgatitor për zgjedhjet e jashtëzakonshme në veri.
Ministri i Brendshëm, Xhelal Sveçla, të martën ka theksuar se Policia ka filluar hetimet për identifikimin dhe sjelljen para drejtësisë të autorëve të këtyre sulmeve.