Më 10.05.2026 ka përfunduar afati për aplikim për certifikim të subjekteve të reja politike.
Valmir Elezi, zëdhënës i Komisionit Qendror të Zgjedhjeve ka njoftuar se ky institucion ka pranuar aplikimin për certifikim nga tri koalicione, një nismë qytetare dhe një kandidat i pavarur për zgjedhjet e parakohshme që do të mbahen më 07.06.2026.
“Pas periudhës zgjedhore për njoftim të pjesëmarrjes në zgjedhje nga partitë politike dhe për formim të koalicioneve (1 – 7 maj), si dhe periudhës për aplikim për certifikim nga subjektet e reja politike (2 – 10 maj), numri i përgjithshëm i subjekteve politike që mund të jenë pjesë e zgjedhjeve të parakohshme, është: 27, prej tyre 22 parti politike; tri koalicione; një nismë qytetare; dhe një kandidat i pavarur.” – ka thënë Elezi.
Ai ka shpjeguar se sipas ligjit, partitë politike të regjistruara konsiderohen automatikisht të certifikuara, prandaj procesi i certifikimit vlen vetëm për subjektet e reja politike, përkatësisht koalicionet, nismat qytetare dhe kandidatët e pavarur.
“Pas përmbylljes së procesit të certifikimit, KQZ do të organizojë tërheqjen e shortit për renditjen e tyre në fletëvotimin e zgjedhjeve të parakohshme për Kuvendin e Kosovës.” – ka thënë ai.
Deri më 12.05.2026 subjektet politike duhet të dorëzojnë online listën me emrat e kandidatëve për deputetë për certifikim të pjesëmarrjes në zgjedhjet e parakohshme.
Nisma qytetare që ka aplikuar për certifikim për pjesëmarrje në zgjedhje është Složno Pobeđujemo kurse kandidati i pavarur është Esmir Kasi.
Tri koalicionet për këto zgjedhje janë Koalicioni Vakat, Ashkalitë e Bashkuar dhe koalicioni mes Lëvizjes Vetëvendosje, Guxo, Alternativa dhe Partia Shqiptare Demokristiane.
22 partitë politike që kanë njoftuar pjesëmarrjen në zgjedhje janë:
- Partia Socialdemokrate;
- Kosovaki Nevi Romani Partia;
- Partia Socialdemokrate e Ashkalinjve;
- Za Slobodu Pravdu i Opstanak;
- Srpska Lista;
- Yenilikçi Türk Hareket Partisi;
- Lidhja Demokratike e Kosovës;
- Fjala;
- Lëvizja Përparimtare e Romëve të Kosovës;
- Partia Rome e Bashkuar e Kosovës – PREBK;
- Socialdemokratska Unija;
- Jedinstvena Goranska Partija;
- Kosova Demokratik Türk Partisi;
- Nova Demokratska Stranka;
- Iniciativa e Re Demokratike e Kosovës;
- Kosovski Savez;
- Partia Balliste;
- Partia Qytetare për Mirëqenie Sociale;
- Partia Liberale Egjiptiane;
- Aleanca për Ardhmërinë e Kosovës;
- Stranka Demokratske Akcije; dhe
- Partia Demokratike e Kosovës.
