Besimtarët myslimanë nga e gjithë bota fillojnë këtë javë Pelegrinazhin e Haxhit, një nga Pesë Shtyllat e Islamit.
Miliona njerëz janë mbledhur në Mekë për të nisur ritualet fetare që e kanë origjinën më shumë se 1,400 vjet më parë.
Sakrificës së tyre iu shtohen edhe temperaturat ekstreme dhe dielli përvëlues. Pelegrinët e vitit të kaluar luftuan u përballën me temperature që arritën deri në 47 gradë Celsius dhe më shumë se 1300 njerëz humbën jetën.
Këtë vit, autoritetet saudite këshillojnë kujdes nga rrezet e diellit direkte, duke u thënë pelegrinëve të shmangin daljen gjatë ditës dhe zbulimin e kokës, përveç ritualeve dhe nëse është e nevojshme.
Arabia Saudite ka ndaluar fëmijët nën 12 vjeç nga Haxhi i këtij viti – një nga ndryshimet më të mëdha të politikave në vitet e fundit.
Riadi thuhet se e prezantoi ndalimin si një masë paraprake për sigurinë e fëmijëve gjatë pelegrinazhit, i cili mund të jetë një mjedis i rrezikshëm për ta për shkak të turmave të mëdha.
Fëmijët janë të përjashtuar nga kryerja e Haxhit dhe nuk janë të detyruar të përmbushin detyrime të tjera islame, si lutja dhe agjërimi, derisa të arrijnë pubertetin.
Por kjo nuk i ndalon disa prindër të duan t’i çojnë fëmijët e tyre për të përjetuar Haxhin dhe për të parë vendin më të shenjtë në Islam, Qaben, strukturën e zezë në formë kubi që është pika qendrore për lutjet e përditshme.