Instituti Hidrometeorologjik i Kosovës ka njoftuar se reshjet e shiut që përfshinë vendin gjatë ditës së djeshme kanë pasur ndikim pozitiv në mjedis dhe në sektorë të ndryshëm të jetës.
Sipas institutit, reshjet kanë përmirësuar lagështinë e tokës, duke krijuar kushte më të favorshme për zhvillimin e kulturave bujqësore. Po ashtu, ato kanë ndikuar në uljen e përqendrimit të ndotësve në atmosferë dhe në përmirësimin e cilësisë së ajrit, ndërsa kanë kontribuar edhe në rritjen e rezervave ujore sipërfaqësore dhe nëntokësore, të rëndësishme për furnizimin me ujë dhe ruajtjen e ekosistemeve natyrore.
Për ditën e shtunë, më 13 qershor, parashikohet mot kryesisht me diell dhe me vranësira të shpërndara në të gjithë territorin e Kosovës.
