Prej nëntorit të vitit 2020, janë në paraburgim. E arsyen për ta vazhduar këtë masë, Gjykata Speciale e kishte të njëjtë.
Kryesisht ishte ajo e rrezikut që Thaçi, Veseli, Krasniqi e Selimi, të ndikojnë në dëshmitarë apo prova.
Por, për pak ditë, kjo arsye nuk do të qëndrojë.
Të paktën kështu shpresojnë ekipet mbrojtëse, juristët dhe njohësit e procesve juridike.
Sipas tyre, me përfundimin e rastit të Prokurorisë së Hagës, përfundojnë edhe arsyet për vazhdimin e paraburgimit.
Kjo pasi krerët e UÇK-së në asnjë rrethanë më nuk mund të ndikojnë as në prova dhe as në dëshmitarë.
Në deklaratat e tyre publike, avokatët e Hashim Thaçit e Rexhep Selimit, kanë theksuar se gati 5 vjet në paraburgim, është kohë e gjatë.
Sipas tyre, pas përfundimit të rastit të Prokurorisë, ata do ta shqyrtojnë kërkesën për lirim nga paraburgimi, dhe caktimin e një mase më të butë.
Gazetari i Nacionales, Besian Beha, ka qëndruar në Hagë gjatë gjithë javës, dhe ka mësuar se pavarësisht ndryshimit të rrethanave, dhe shpresës që ekziston për lirim nga paraburgimi, ky pritet të jetë një vendim i Gjykatës. Kjo e fundit, ka treguar se funksionon ndryshe nga Tribunali i Hagës apo gjykatat e tjera.
Si rezultat, mbete të shihet se cili mund të jetë vendimi, që mbase mund të jetë indikativ edhe për veprimet pasuese në Hagë.
Paraburgimi në aspektin juridik llogaritet si masë e fundit. Por, për krerët e UÇK-së kjo ka qenë masë e parë dhe e vetme.
Mirëpo, me dorëzimin e provave dhe përfundimin e dëshmitarëe, vazhdimi i paraburgimit po cilësohet si shkelje e të drejtave të të akuzuarve.
Vullnet Bugaqku, hulumtues në KDI, ka shkruar në rrjete sociale se nuk ka arsye për vazhdimin e kësaj mase.
“Kjo ngase, me përfundimin e dëgjimit të dëshmitarëve të Prokurorisë, nuk ka më ndonjë rrezik real apo mundësi për ndërhyrje në procesin gjyqësor, sidomos në frikësimin e dëshmitarëve të Prokurorisë. Përndryshe, heqja eventuale e masës së paraburgimit dhe zëvendësimi i saj me një masë më të butë, do të ndihmonte në garantimin e drejtësisë dhe shmangien e ndalimit të paarsyeshëm të personave të akuzuar në këtë rast. Po ashtu, një veprim i tillë, do të ndikonte në përmirësimin e imazhit dhe rritjen e besimit të publikut në punën e kësaj gjykatë në tërësi”, shkruante ai.