Në një ceremoni përplot emocion dhe dhimbje, janë rivarrosur eshtrat e Elhami Tahiragës, qytetarit nga Rahoveci, i cili ishte zhdukur që nga data 19 korrik 1998, gjatë luftës në Kosovë.
Elhami Tahiraga ishte një prej mijëra personave të zhdukur me dhunë nga forcat serbe gjatë konfliktit të viteve ’90. Pas 27 vjetësh, eshtrat e tij u identifikuan dhe iu dorëzuan familjes për një varrim dinjitoz në vendlindje.
Kryetari i Komunës së Rahovecit, Smajl Latifi, mori pjesë në ceremoninë e rivarrimit dhe tha se “ekzekutimi dhe zhdukja e Elhamiut janë dëshmi e një regjimi që s’i përket botës së qytetëruar, por errësirës së Mesjetës”. Ai shtoi se tani familja dhe miqtë e tij kanë mundësinë t’i bëjnë nderimet e merituara një njeriu që u vra duke ndihmuar bashkëvendasit e vet në ditët më të vështira të Rahovecit.
Komuna e Rahovecit u ka shprehur ngushëllimet më të sinqerta familjarëve të Elhami Tahiragës, duke theksuar nevojën për drejtësi dhe për të mos harruar ata që sakrifikuan për lirinë e vendit.