Partia në pushtet Lëvizja Vetëvendosje ka publikuar një video me të cilën i ka quajtur ish-partitë që kishin qeverisur, apo opozitën e tashme, si dhe sindikatat, shkatërrues të shtetit.
“Shkatërruesit e shtetit që nuk duan ta shohin Kosovën mirë për 20 vite kanë qeverisur vendin. Herë vetëm e herë njëri me tjetrin. Formalisht të ndarë në parti të ndryshme por praktikisht në një qëllim: Rreth Kosovës së përbashkuar që e shihni veç si tender, si ryshfet, si haraç, si krim, si korrupsion e si çka tjetër. Ishte vetëm një subjekt që s’ishte në anën e tyre, VETËVENDOSJE!” – thuhet në përshkrimin e videos të postuar në faqen e Vetëvendosjes në Facebook.
Vetëvendosje ka thënë se lufta e opozitës ka kaluar në një nivel tjetër me sabotim përmes organizmave të kapur. Dhe se po prodhohen emergjenca në mënyrë që pushteti “të mos merret me shtetin e shoqërinë si duhet”.
“Duan të mbysin çdo përpjekje për vendin sepse nuk duan ta shohin atë tek lulëzon”, thuhet në videomesazhin. “Zhurmë, sharje, grevë e çka tjetër vetëm për të sabotuar shtetin e sulmuar Qeverinë. Cilën Qeveri, atë që suksesshëm u përballë me pandeminë, që u gjet në moment të duhur të krizës me ekonomi, duke ndihmuar qytetarët, e që po përballet me krizën e inflacionit dhe do të merret edhe me energjinë. Për një vit e gjysmë në Republikën e Kosovës u bë e mundur të qeveriset pa asnjë skandal qeveritar. Për një vit e gjysmë ata që nuk u përllogaritën kurrë nga shteti filluan ta ndiejnë dorën e tij. Zhurma e tyre vazhdon. Por, Qeveria nuk shantazhohet. Vetingu dhe Byroja për konfiskimin e pasurisë do të bëhen. Hajnat do të japin përgjegjësi. Vendi do të bëhet i mirëqenies dhe zhvillimit. Qeveria e Lëvizjes Vetëvendosje nuk zmbrapset”.