Gjatë javës së ardhshme në Kosovë pritet të mbajë mot i paqëndrueshëm.
Instituti Hidrometeorologjik i Kosovës ka thënë se kjo vjen si pasojë e masave të lagështa të ajrit me origjinë perëndimore dhe jugperëndimore. Parashihen reshje shiu në viset e ulëta, ndërsa në disa pjesë do të krijohen kushte edhe për reshje bore.
Do të ulen dukshëm temperaturat krahasuar me javën paraprake.
Të hënën moti do të jetë i vranët dhe me riga shiu, ndërsa në viset e larta në disa zona perëndimore parashihen edhe reshje bore. Temperaturat minimale do të lëvizin mes 3 dhe 5 gradë celsius, e maksimalet mes 6 dhe 10 gradë.
Të martën moti do të jetë me diell e vranësira të shpërndara. Ndërsa vranësirat vende-vende do të sjellin riga shiu. Temperaturat minimale do të lëvizin mes minus 4 dhe minus 1 gradë, ndërsa maksimalet mes 4-7 gradë.
Të mërkurën parashihet mot me diell, ndërsa temperaturat minimale do të lëvizin mes minus 3 dhe minus 1 gradë celsius, e maksimalet mes 8-12 gradë. Mot i ngjashëm do të mbajë edhe të enjten, por temperaturat do të shënojnë rritje, ku maksimalet do të arrijnë deri 16 gradë.
Të premten parashihet mot i vranët e me intervale me diell. Temperaturat minimale do të lëvizin mes 3-5 gradë e maksimalet mes 14-18 gradë./KOHA/
