Mëngjesin e sotëm fluksi në të gjitha pikat e kalimit kufitar në Kosovë paraqitet i qetë, me pritje minimale dhe pa kolona të raportuara.
Sipas të dhënave të përditësuara nga Qendra Kombëtare për Menaxhim Kufitar në orën 07:25, automjetet dhe kamionët po kalojnë kufirin me kohë pritjeje prej vetëm 3 deri në 5 minuta, si në hyrje ashtu edhe në dalje.
Gjithashtu, nuk janë raportuar kolona në asnjërën prej pikave kufitare, përfshirë pikat më të frekuentuara si Merdar, Dheu i Bardhë, Jarinje e Vërmicë, ku shpeshherë në sezonin veror shënohen pritje e kolona të gjata.
Vetëm në pikën kufitare Hani i Elezit është raportuar se hyrja dhe dalja për kamionë është e bllokuar përkohësisht.
Autoritetet kufitare rekomandojnë qytetarët që të vazhdojnë të ndjekin informatat zyrtare për çdo ndryshim eventual në gjendjen e kalimeve kufitare.