Organizata e Veteranëve të Luftës së UÇK-së ka kërkuar zyrtarisht shkarkimin e kryeparlamentarit Dimal Basha.
Në një konferencë për media, përfaqësuesit e OVL-UÇK-së thanë se kërkesa është dërguar më 28 gusht të gjitha grupeve parlamentare, përveç Listës Serbe. Arsyeja e kërkesës, sipas OVL-UÇK-së, lidhet me një publikim shkencor të Bashës që përmban qëndrime kundër UÇK-së.
Përfaqësuesit paralajmërojnë se nëse nuk merret vendim për shkarkim në seancën e parë të Kuvendit, do të organizohen protesta, të cilat do të njoftohen pas një veprimtarie të planifikuar në Hagë.
“Ne kemi marrë të gjitha veprimet ligjore, kemi bërë kërkesë për shkarkimin e Dimal Gashit, me datën 28 gusht dhe i drejtuar të gjitha grupeve parlamentare të Republikës së Kosovës përveç Listës Serbe që nuk i kemi dërguar. Deri më sot ende nuk kanë kthyer përgjigje, ne si organizatë, do të marrim vendim nëse në seancën e parë që do të mbahet nuk do të marrin vendim partitë opozitare dhe VV me shkarkuar. Ju e dini për çka kërkojmë që ai të shkarkohet – arsyeja është se ka bërë një botim shkencor me një maqedonase që ka bashkëpunuar me të dhe ka shkruar artikull kundër UÇK-së. Nëse nuk merret vendimi për shkarkim, po na imponojnë të dalim në protestë dhe të kërkojmë shkarkimin e tyre. Për protestë do të njoftojmë shpejtë pas protestës që do ta kemi në Hagë.”, ka theksuar ai./Sinjali